Komîyeta Amadekar a 1’ê Gulanê, li Kazanci Yokûşû ya li Qada Taksîmê qurbaniyên di pîrozbahiya 1’ê Gulana 1977’an de hatibûn qetilkirin, bi bîr anîn. Gelek parlamenter, siyasetmedar, nûnerên sazî û dezgehên civakî yên sivîl li ber Navenda Çanda Ataturk (AKM) li hev kom bûn û bi pankarta, ‘Bijî 1’ê Gulanê’ heta Kazanci Yokûşû meşiyan.

‘TI ZEXT NIKARIN VÊ DÎROKÊ PAQIJ BIKE’

Di bîranînê de pêşî Seroka Giştî ya DÎSK’ê Arzû Çerkezoglû axivî û got: “Qada pîrozbahiya 1’ê Gulanê Taksîm e, lê îsal jî li karker û kedkaran hat qedexekirin. Ew kesên dixwazin bîra me jê bibin û bidin jibîrkirin bila baş dizanibin wê tu zext û qedexe nikaribû vê dîroka bi rûmet li be bidin jibîrkirin. Em ê serweriya heramiyan hilweşînin.”

BANGA GEŞKIRINA TÊKOŞÎNÊ

 Hevseroka KESK’ê Aysun Gezen jî axivî û behsa têkoşîna pîrozbahiyên 1’ê Gulanê kir û bang li her kesî kir ku beşdarî pîrozbahiya 1’ê Gulanê bibin û têkoşîna xwe bilind bikin. 

‘JI KUŞTINÊ TÊR NABIN’ 

Serokê Desteya Rêveber a TMMOB’ê Emîn Koramaz jî hemû komkujiyên piştî komkujiya 1977’an qewimîn bibîr xistin û got: “Me şahidiya gelek komkujiyan kir. Ji kuştinê têr nabin.”

 ‘EM Ê LI QADAN BIN’

Serokê Konseya Navenda Yekîtiya Tabîbên Tirk (TTB) Sînan Adiyaman jî diyar kir ku wê li dijî her neheqiyê têbikoşin û wê rêxistinên tenduristiyê û hekîm di 1’ê Gulanê de li qadan bin û daxwaz û gotinên xwe bînin ziman. 

Piştî axaftinan, navê kesên hatibûn qetilkirin, yek bi yek hat xwendin û bi gotina “Dijîn” hatin bersivandin. Piştre şandeyê qurnefîl danîn şûna kesên lê hatine kuştin.

Komîteya Amadekar piştî bîranînê derbasî Kolana Îstîklalê bû û belavokên vexwendameya 1’ê Gulanê belav kirin. Heta Qada Şîşxaneyê belavok belav kirin û piştî li vir axaftin kirin dawî li çalakiya xwe anîn.