Li Wanê, zextên polîsan ên li ser avahiya DBP’a bajêr hat protestokirin.

Serdegirtina îro li ser avahiya DBP’a Wanê pêk hat bi daxuyaniyek çapemeniyê ya girseyî hat protestokirin. Endamê Desteya Rêveber ê Navendî yê HDP’ê Dogan Erbaş, Parlamentera HDP’ê ya Wanê Bedîa Ozgokçe, Hevşaredarê Bajarê Mezin ê Wanê Bekîr Kaya, Rêveberên DBP’a Wanê, aktîvîstên KJA û gel tevlî daxuyaniya çapemeniyê ya li ber avahiya bajêr bûn.

Destpêkê Cîgira Hevseroka DBP’a Wanê Nazmiye Acar axivî, got bi awayekî bê hiqûq ser avahiya partiyê de girtine û her wiha hevserokên wan binçav kirine. Acar got tevî hemû polîtîkayên wan ên bêzarkirinê jî wê têkoşîna xwe bidomînin.

‘ZEXT WÊ BÊ ENCAM BIMÎNIN’

Endamê Desteya Rêveber ê Navendî yê HDP’ê Dogan Erbaş bi kurtahî axivî, diyar kir ku wê hewldanên wan ên astengkirina Newrozê bê encam bimînin, got: “Hikûmet pir eşkere ye ku ji heybeta Newrozê ditirse. Zextên wisa bi salan e tên ceribandin û bê encam in.”

Parlamentera HDP’ê ya Wanê Bedîa Ozgokçe Ertan jî destnîşan kir ku ev zextên wisa yên li ser partiyên siyasî nayên qebûlkirin, banga hestiyariyê li gel kir.