Daîreya Bilind a Dadgeha Mafên Mirovan a Ewropayê (DMME) biryar da ku dewleta Tirk li dijî biryarên DMME'yê karsaz Osman Kavala girtî dihêle û bi vî rengî Peymana Mafên Mirovan a Ewropayê (PMME) binpê dike.
Komîteya Wezîran a Konseya Ewropayê ku ji kontrolkirina bicihanîna biryarên DMME'yê berpirsyar e, ji DMME'yê pirsî ku Tirkiyeyê berpirsyariyên xwe yên têkildarî biryarên sala 2019'an ên DMME'yê bi cih aniye yan na. Daîreya Bilind a DMME'yê têkildarî vê pirsê li hemberî dengekî dijber bi 16 dengan biryarek da.
Piştî biryara DMME'yê ya 10'ê Kanûna 2019'an a ji bo berdana Osman Kavala, di 18'ê Sibata 2020'î de dadgeheke herêmî biryara berdana bi şert dabû. Lê belê bi sûcdariya 'hewldana darbeyê' Kavala mehan rojê careke din hatibû girtin. Her wiha di 9'ê Adara 2020'î de sûcdariya sîxuriyê li Kavala hate kirin.
Daîreya Bilind diyar kir ku gumana li ser mijara sîxuriyê li karên Kavala yên li nava Rêxistinên Civakî yên Sivîl tê spartin û gihîşt wê encamê ku bûyereke nû nîne ku girtina Kavala û gumana sîxuriya leşkerî yan jî siyasî mafdar nîşan bide.
DMME'yê bi hinceta ku Tirkiyeyê di doza Osman Kavala de berpirsyariyên xwe yên têkildarî biryarên DMME'yê de bi cih neaniye, hikum da ku xala 46/1 a PMME'yê binpê kiriye. Her wiha biryar da ku 7 hezar û 500 Euro mesrefê dadgehê bidin Kavala.
