Navenda Ragihandinê ya YPG'ê li ser encama şerê duh bi şev ê li Şeddadê ji ber êrîşa çeteyên DAIŞ'ê rû da, daxuyaniyeke nivîskî weşand.

Di daxuyaniyê de hat ragihandin, çeteyên DAIŞ'ê roja 26'ê Mijdarê saet di 03:30 de, êrîşeke berfireh birin ser gundê Ebû Fas û herêma navbera gundên Malha û Mekmen ên ser bi Şeddadê ve.

Li gorî daxuyaniyê, ev êrîş bi piştgiriya maşîneyên zirxî û hejmareke zêde ya çeteyan bi 5 baskan ve li dijî 4 nuqteyên hêzên YPG'ê hatiye kirin.

Navendê diyar kir, hêzên YPG/YPJ'ê bersiv dan êrîşê û li hemû nuqteyan şerekî dijwar qewimî. Hat gotin, şer bi rengekî sînge sîng û dijwar, heta saet 12:00 bênavber dewam kir.

Di dewama daxuyaniyê de hat ragihandin, çeteyan her wiha bi hawanan gund û derdora Ezawî jî topbaran kirin û di encama şerekî dijwar de êrîş hatiye şikandin.

57 ÇETE HATIN KUŞTIN, GELEK MAŞÎNÊN ZIRXÎ HATIN RÛXANDIN

Navendê da zanîn, piştî têkbirina êrîşê, hêzên YPG/YPJ'ê li herêmê dest bi operasyonê kirin, dor li çeteyan girtin û gelek ji van çeteyan kuştin.

Li gorî daxuyaniyê, di vî şerî de 5 panzer, 4 doçka û 2 maşîneyên leşkerî yên DAIŞ'ê hatin rûxandin û bi giştî 57 çete hatin kuştin. Navendê diyar kir, operasyona hêzên wan a lêgerîn û paqijkirina herêmê dewam dike.

6 ŞERVANAN JIYANA XWE JI DEST DAN

Di dewama daxuyaniyê de hat gotin, "6 hevalên me yên ku bi lehengî şer kirin û êrîşa çeteyan têk birin, gihîştin şehadetê."