Bi dirûşmeya “Xwedîderketina li berxwedana Arîn Mîrxan, misogeriya serketina bihara gelan e” duh kongreya jinûve avakirina Tevgera Ciwanan li Rojava bi amadebûna 325 nûnerên ji hemû bajar û deverên Rojavayê Kurdistan hate lidarxistin.

Kongre li Navenda Çand û Hunerê a Aram Tîgran a li bajarokê Rimêlanê hate lidarxistin. Salona kongreyê bi wêneyên têkoşeran û Rêberê Gelê Kurd Abdullah Ocalan û pankartên bi nivîsên wekî “Pêşengtiya ciwanan misogeriya serketinê ye” û “Me bi ciwanan destpê kir, em ê bi ciwanan bi ser bikevin.” hat xemilandin.

Di kongreyê de Serokê Desteya Ciwan û Werzîşê ya Kantona Cizîrê Mihemed Fatimê û nûnerên Tevgera Ciwanên Şoreşger, Tevgera Jinên Ciwan ên Şoreşger, Konfedrasyona Xwendekarên Kurd ên Welatparêz, tevgerên ciwanan ên girêdayî partiyên di bin banê Tevgera Civaka Demokratîk (TEV-DEM) û nûnerên ciwanên Partiya Çep a Kurd li Sûriyeyê beşdar bûn. Her wiha nûnerên buroya ciwanan a Desteya Niştimanî ya Ereban, Tevgera Ciwanên Welatparêz a Bakurê Kurdistanê, Saziya Malbatên Şehîdan, Tevgera Ziman û Perwerdeyê, Ciwanên Şengalê, Meclîsa Werzîşê yên Saziyên Civaka Sivîl û Komîseriya Bilind a Hilbijartinan amade bûn.

Di kongreyê de li ser navê TEV-DEM’ê axaftinek hate, her wiha hin paragraf ji axaftinên Rêberê Gelê Kurd Abdullah Ocalan hatin xwendin. Di kongreyê de li ser navên KCK’ê û Tevgera Jinên Ciwan, Desteya Ciwan û Werzîşê ya Kantona Cizîrê, Komîteya Ciwanan a Meclîsa Zagonsaz, Ciwanên Partiya Çep a Kurd li Sûriyeyê, Tevgera Ciwanên Bakurê Kurdistanê û Ciwanên Şengalê axaftin hatin kirin.

Di berdewama Kongreyê de raporên tevgerên ciwanan ên Rojava yên du salên borî hatin xwendin û pêşnûmeya hevpeymana tevgerên ciwanan hate nîqaşkirin û hat erêkirin.

Li ser pêşniyarên ku ji aliyê tevgerên ciwanên Rojava ve hatine pêşkêşkirin di kongreyê de biryar hate girtin ku saziyeke berfireh ku ji hemû tevger û rêxistinên ciwanan ên Rojava di bin navê “Yekîtiya Ciwanên Demokratîk li Rojavayê Kurdistanê” û aleke taybet bi wê were pejirandin, hate girtin.

Kongre bi gelek biryaran bi dawî bû, hin ji biryarên hatine girtin ev in:

1- Ji bo azadiya Rêberê Gelê Kurd Abdullah Ocalan asta têkoşînê bê bilindkirin.

2- Hemû tevgerên ciwanan li gorî hevpeymana Yekîtiya Ciwanên Demokratîk li Rojavayê Kurdistanê û li gorî taybetmendiya her rêxistinekê tevbigerin.

3- Mîhrîcaneke ciwanan salane di 21’ê Nîsanê de bi navê têkoşer Hogir Kobanê bê lidarxistin.

4- Komên hunerî û çandî yên pispor li ser asta Rojava bêne avakirin.

5- Klûbên werzîşê yên ciwanan bêne vekirin û tîmên werzîşê yên pispor li ser asta Rojava bêne avakirin.

6- Têkoşîna li dijî êrîşên ku destketiyên şoreşa Rojava hedef digirin, bi israr bê domandin.

7- Asta perwerdeyên ramiyarî di akademiyên ciwanan de bê bilindkirin.

8- Rêxistin û çalakiyên çapemenî û ragihandina taybet bi ciwanan bê pêşxistin.

Kongre şevê din bi pêşkêşkirina belgefîlmekî der barê têkoşîn û çalakiyên ciwanan de û gerandina dîlanê û qîrîna dirûşmeyên dilsoziya bi cangoriyan re bi dawî bû.