Tevgera leşkerî ya artêşa Tirk didome
Ligel bombardûman, tevgera hewayî û kemînên artêşa Tirk, li Bakurê Kurdistanê xebatên kontra didomin.
Navenda Çapemenî û Ragihandinê ya HPG’ê têkildarî tevgera leşkerî ya artêşa Tirk daxuyaniyeke nivîskî weşand.
HPG’ê diyar kir artêşa Tirk li hember Hêrêmên Parastinê yên Medya êrîşên bi obus û hewanan dewam dike û tevgera hewayî didomîne. HPG’ê ev agahî da:
“11’ê Hezîranê saet di navbera 06:00 - 15:00’an de li ser herêma Qendîl a yek ji Herêmên me yên Parastinê yên Medya ye pêgerên hewayî yên bêmirov ên artêşa T.C a dagirker keşf pêk anîne. Ev tevgera hewayî li herêmên me yên gerîla zêde bûne. li gor vê;
Di navbera 9’ê Hezîranê saet 18:00 û 11’ê Hezîranê saet 22:00 û 12’ê Hezîranê saet di navbera 05:00 - 12:00’an de li qadên Şûkê û Şehîd Rahîme yên girêdayî herêma Avaşîn, di navbera 11’ê Hezîranê saet 20.00 û 12’ê Hezîranê saet 11.00 li herêma Metîna, di navbera 11’ê Hezîranê saet 21.00 û 12’ê Hezîranê saet 11.00’an de li herêma Zapê û li qadên Garêya Mezin û Geliyê Zapê yên li ser sînor, 11’ê Hezîranê saet di navbera 15.00-21.00’an de li herêma Heftanîn, pêgerên hewayî yên bêmirov ên artêşa Tirk keşf pêk anîne. Her wiha 11’ê Hezîranê saet di navbera 19.00-20.00’an li herêma Heftanîn û li ser xeta sînor balafirên şer geriyane.
11’ê Hezîranê saet di navbera 21:00 - 22:00’an de ji Qereqola Oremar a girêdayî navçeya Gever a Colemêrgê li hember qadên Şehîd Rehîme, Girê Şehîd Bager û Girê Şehîd Zerdeşt bi obus, hewan û tankan bombardûmanek pêk hatiye. Her wiha 12’ê Hezîranê saet di navbera 11:00 - 12:00’an de Qereqola Oremar li hember qada Şûkê bi hewanan bombardûmanek pêk aniye.
Di navbera 10’ê Hezîranê danê êvarî û 11’ê Hezîranê danê sibehê di navbera gundên Dêrcan û Kûbikê yên girêdayî navçeya Hezo ya Amedê artêşa T.C a dagirker kemîn danîne.
10’ê Hezîranê saet di navbera 22:00 - 23:00’an de di navbera mezraya Bedran û gundê Alpîre yên girêdayî Kanîreş a Çewlikê komeke di nav xebatên kontra de rasterast gule berdane hewayê. Vê koma kontra xwestiye zextê li gelê vê herêmê bike.
Li Girê Îlon ê girêdayî navçeya Farqîn a Amedê bi hinceta ewlekariya bendavê artêşa T.C a dagirker ji bo li herêmê kontrolê bi dest bixe çeper û kuleyên nû çêdike.
