Şerê li Nisêbînê dewam dike
Li Nisêbînê ku ev 20 roj in berxwedan lê heye, êrîşa bi top û hawanan dewam dike. Hat ragihandin, di şerê li vir de polîsekî tîmên taybet bi çalakiyeke sûîqestê bi giranî birîndar bû.
Di roja 20. a êrîşên qirkirinê de, hêzên rejîma Tirk bênavber êrîşî taxên berxwedanê dikin. Êrîş bi giranî bi topan li hemberî taxên Firat, Abdulkadîrpaşa, Yenîşehîr û Dîcleyê tên kirin. Her wiha ji Qereqola Gurun TRT û Tabûra Jendermeyan a YÎBO, hawan li taxên berxwedanê tên barandin.
Duh êvarê, li hemberî tîmekî taybet ê li nêzî Nexweşxaneya Dewletê ya berê bi cih bûbû, hêzên YPS'ê çalakiyeke sûîqestê pêk anîn. Di encamê de ev polîsê dewleta Tirk bi giranî birîndar bû û rakirin Nexweşxaneya Dewletê ya Nisêbînê.
Êrîşên bi top û hawanan ên li hemberî taxên berxwedanê ji şevê û vir ve her dewam in.
