Li dû azadkirina gundê Zaretê, ku li pêşberî bajarê Cerablûsê ye, şêniyên herêmê li hemberî êrîşên gengaz ên çeteyan yekîneyên xwe yên parastina cewherî ava kirin û berê tivinga xwe dan Cerablûsê.

Li dû azadkirina gundê Zaretê yê li pêşberî baregeha çeteyan Cerablûsê ye, gundiyên li cih û warên xwe vegeriyan hêzên xwe yên parastina cewherî ava kirin. Gundê Zaretê yê 40 kîlometre dûrî bajarê Kobanê ye û li qiraxa Çemê Firatê ye, ji bo çeteyên dixwestin ji aliyê rojava ve xwe berdin nava Kantona Kobanê nuqteyeke stratejîk e. Bi operasyona pêr a hêzên YPG/YPJ'ê re gund hat azadkirin. Zaretiyên li gundê xwe vegeriyan, bi pêşengiya YPG/YPJ'ê re di parastina cewherî ya gundê xwe de cih girtin.

RÊ LI DAIŞ'Ê GIRTÎ YE

Bekirê Hemê yê 53 salî ku ji ber êrîşên çeteyên DAIŞ'ê neçar ma koçî bajarê Dîlokê bike û bi azadbûna gund re vegeriya got, "Li dû azadkirina gund, li ser banga hêzên YPG/YPJ'ê, ji bo di parastina cewherî ya gund de cih bigirim, ez hatim." 

Bekirê Hemê bal kişand ser hovîtiya DAIŞ'ê li gundê wan kiriye û got, "Deriyê hemû malên li gund şikandine û avêtine derve. Hemû alavên li nava malan ji hev belav kirine û yên kêrhatî dizîne." Bekirê Hemê anî ziman ku bi qasî 100 wesayîtên li gund ji aliyê çeteyên DAIŞ'ê ve hatine dizîn û got, "Ji bo ev çete careke din cih û warên gel talan nekin, tevî vî emrê xwe jî ez ê li gel hêzên YPG/YPJ'ê tevbigerim."