Li hin bajarên Swêdê Newroz li salonên girtî, li hin cihan jî li meydan û parkan bi dadana agir tê pîrozkirin.

LI BAJARÊ GAEVLE AGIRÊ NEWROZÊ HAT DADAN

Kurdistaniyên li bajarê Gaevle dijîn, cejna xwe ya Newrozê îsal li Parka Boulognerskoken a li qiraxa çem bi dadana agir û gerandina govendê pîroz kirin. Li dû deqeyeke rêzgirtinê ji bo bîranîna cangoriyên şoreşê, endamê Desteya Rêveber a Meclîsa Gel a Gaevleborgê Cemal Îbrahîmî peyivî. Îbrahîmî piştî vegotina dîroka Newrozê, bûyer û pêşketinên dawî yên li Tirkiye û Rojavayê Kurdistanê nirxand.

Îbrahîmî ragihand ku cudahiya Newroza îsal ji yên bihurî ew e ku hîn bêhtir nêzî çareseriyê ye û got, "Heta roja îro di Newroza de me gelek şehîd dan. 40 sal in em şehîdan didin û em dixwazin êdî Newroz li gorî wateya xwe ya cewherî bi azadiyê were bîranîn."

Hevserokê Meclîsa Civaka Demokratîk a Kurd li Gaevleborgê Êrîş Batte jî di axaftina xwe de êrîşên çeteyên DAIŞ'ê yên li hemberî Kurdistanê û berxwedanên li Şengal û Kobanê nirxand. Batte ragihand ku sala 2015'an sala serketinê ya Kobanê û Şengalê ye û got, "Di encama van de em bi hîn bêhtir ewle li pêşerojê dinêrin."

Li dû axaftinan Kurdistaniyan govend gerandin û Newroza xwe pîroz kirin.

LI STOCKHOLMÊ LI MEYDANÊ HAT PÎROZKIRIN

Li paytext Stockholmê komek, li ser banga ciwanên ji Başûrê Kurdistanê li Meydana Sergel a li navenda bajêr Newroz pîroz kir. Di axaftinên li vir de berxwedanên li Kobanê û Şengalê hatin silavkirin û hat destnîşankirin ku pîrozbahiyên Newrozê yên li gelek bajarên Kurdistanê di heman demê de pîrozkirina serketina Kobanê ne.

PÎROZBAHIYA MEZIN WÊ ÎRO LI STOCKHOLMÊ PÊK WERE

Pîrozbahiya Newrozê ya girseyî û navendî wê îro li Solnahallen a Stockholmê were lidarxistin. Pîrozbahî wê saet di 17:00 de destpê bike û Nasir Rezazî, Nûarîn, Comert, Koma NûrDîl, Mîran û Ferhat derkevin ser dikê. Her wiha Hevserokê PJAK'ê Hecî Ehmedî û bernamzetê HDP'ê yê Rihayê Osman Baydemîr wê ji beşdaran re biaxivin.