Serokê Baroyê Tahîr Elçî di axaftina xwe ya li vir de got, "Newroz azadî ye, aştî ye, biratî ye, dawîanîna li qirêjî û xerabiyê ye, roja destpêkirina bedewiyê ye."

Baroya Amedê, ji bo mêvanên û siyasetmedarên ji ber Newrozê hatine, resepsiyonek da. Di resepsiyona li Avahiya Cemîlpaşa de Serokê Baroyê Elçî axivî û diyar kir ku Newroz a beriya çend salan bi xwîn û hêsrên çavan dihat bîranîn, îro di rewşeke azad û aştiyê de pîroz dikin. Elçî anî ziman ku ew ji ber nêzîkatiyên bi rêyên aştiyane û demokratîk ên ji bo çareseriya pirsgirêka Kurd kêfxweş in û got, "Li vê avahiya dîrokî ji her bawerî, çand, ol û beşên civakê mirov li gel hev in. Newroz bi xwe vê nîşan dide."

Li dû axaftinê li hewş û ser banê avahiyê agirê Newrozê hat dadan û li ser Newrozê sînevîzyonek hat nîşandan.

Di resepsiyonê de Parlamentera Stenbolê Sebahat Tûncel, Parlamenterê Şirnexê Hasîp Kaplan, Parlamenterê Mersînê Ertûgrûl Kurkçu, Hevşaredarê Bajarê Mezin ê Mêrdînê Ahmet Turk, Hevşaredarê Agiriyê Sirri Sakik, Walî Huseyîn Aksoy, Alîkarê Serokê Giştî yê CHP'ê Sezgîn Tanrikûlû, Serdozgerê Komarê Ramazan Solmaz, parêzer, rojnamevan û mêvanên biyanî amade bûn.