Li gel astengiyên polîsên Tirk bi hezaran kes tevlî merasima cenazeyên gerîlayên HPG'ê bûn. Bi hezaran kes li ber Mizgefta Bayramoglu li hev kom bûn û heta goristana Yenîkoyê meşiyan.

Cenazeyên gerîlayên HPG'ê Hakan Ceylan (Dijwar Amed) û Hîcran Gersiyor (Axîn Viyan) ên ku di 22'yê mijdarê de li navçeya Dara Henê ya Çewlîkê jiyana xwe ji dest dan 2 roj in polîs destûrê nadin bispêrin axê.

Ji bo cenazeyên gerîlayan meşek girseyî hate lidarxistin. Berî meşê polîsan Amed dorpêç kir. Merasîma cenazeyan a ku dê li Goristana Yenîkoyê pêk hatiba ji aliyê polîsan ve bi hinceta îxbara "propagandeya rêxistinê" û "provokasyonê" hate astengkirin û merasîm pêk nehatibû. Cenazeyên gerîlayan 2 roj in li morga Goristana Yenîkoyê tên ragirtin.

Îro bi armanca şermezarkirina helwestan polîsan bi hezaran kes li Mizgefta Bayramoglu kom bûn û heta Goristan Yenîkoyê dimeşin.

Li qada meşê polîsan tedbîrên gelek berfireh girtin. Li ber Mizgefta Bayramoglu TOMA, wesayîtên zirxî, hêzên “çevîk” û gelek polîsên sivîl lê hatin bicihkirin.

Ji bajarên derdorê re gelek polîs ji bo alîkariyê veguhestin Amedê û li gelek noqteyên bajar hatin bicihkirin.

Lê li gel hemû astengiyan bi hezaran welatiyên li mizgeftê kom bûn heta Goristana Yenîkoyê meşa xwe didomînin.