Derket holê ku kontrayan duh bi şev li gelek nuqteyên Amedê êrîş kirine. Li gorî agahiyên hatin bidestxistin, komek çekdar a a kontra duh bi şev rêya herêma Dîclekent Metropolê li çûn û hatinê girt û kontrola nasnameyan kir. Kontrayan li vê derê xwestin wesayîta Bawer Aslan ê 23 salî bisekinînin. Lê belê dema Aslan xwest bi lez ji cihê koma çekdar biçe, gule li wesayîta wî hat barandin. Hat ragihandin ku 6 gule li wesayîtê ketine û yek jî li milê Aslan ketiye. Koma êrîşkar piştî ku gule li wesayîtê barand, li wesayîtên xwe siwar bû û ji herêmê reviya. Welatiyên li derdorê Aslan rakirin nexweşxaneyê.

Hat ragihandin ku rewşa tenduristiyê ya Aslan xetere nîne û tedawiya wî dewam dike.