Piştî ku herdu hevserokên berê yê Şaredariya Gel a bajarê Kobanê Îbrahîm Xelîl û Şevîn Mehmûd istîfaya xwe pêşkêşî Desteya Rêveberiyên Herêmî û Şaredariyan kirin û istîfaya wan hat qebûlkirin, îro Meclîsa Rêveber a herêma Kobanê civînek lidar xist û hevserokên nû yên şaredariyê diyar kir.

Di civînê de serokên desteyên Meclîsa Rêveber û nûnerên komîteyên Şaredariya Gel amade bûn.

Piştî rêzgirtinê, Serokê Meclîsa Rêveber a Herêma Kobanê Enwer Muslim axivî û spasiya hevserokên berê yên şaredariyê kir. Paşê cîgira Muslim, Bêrîvan Hesen axivî û da xuyakirin, ku heta avakirina Meclîsa Şaredariya Gel a herêmê û hilbijartina hervserokên wê, ew ê bi awakî demkî hevserokên nû yên şaredariyê diyar bikin.

Di civînê de Zehra Berkel û Moro Hisên weke Hevserokên Şaredariya Gel a bajarê Kobanê hatin erkdarkirin. Piştî civînê her du hevserokan berê xwe dan Şaredariya Gel, li wir erka xwe wergirtin û sonda pêkanîna hemû xebatên ji wan tên xwestin xwarin.