Rojnameger Murat Çîftçî ku ji doza KCK'ê ya Rihayê ji ber nûçeya der barê Gulistan Encu çêkiribû dihat darizandin rastî ceza hat. Dîwana dadgeha Tirk li Murat Çiftçî 8 sal û 9 meh cezayê girtîgehê birî.

Rûniştina biryarê ya der barê nûçegîhanê ajansa yê DÎHA yê Rihayê Murat Çiftçî ku ji doza KCK'ê ya Rihayê dihat darizandin, li 7'emîn Dadgeha Cezayê Giran a Amedê pêk hat. Di rûniştinê de Çiftçî û Halîl Dûrdû amade nebûn. Parêzerê Çîftî Serdar Çelebî amade bû. Heyeta dadgehê der barê Çîftçî ku bi Gulîstan Encu re hevpeyvîn çêkiriye û bi îdîaya "Bi zanebûn û xwestin alîkari daye rêxistinê" cezayê 8 sal û 9 meh cezayê girtîgehê birî. Heyetê der barê Halît Dûrdû jî 8 sal û 9 meh cezayê girtîgehê birî. Parêzerê Çiftçî, biryara dadgehê rexne kir û anî ziman ku biryara hatiye dayîn li dijî hiqûqê û mafên mirovan e.

Di îdîanameyê de hatibû îdîakirin ku ji ber pêkûtiyên rêxistin û BDP'ê Encu û hevserê wê yê bi mehra melle zewicîne Omer Înal ji axivîne. Tevî ku Murat Çîftçî peymana wî bi ajansa DÎHA'yê re heye û nûçegihaniya DÎHA’yê dike jî di îdîanameyê de wekî nûçegihanê ANF’ê hatibû destnîşankirin.

Dîsa di îdîanameyê de tê îdîakirin ku bersûcê doza KCK'ya Rihayê Halît Durdu û Çîftçî gef li Encu û Înal xwarine ku ew di hevpeyvîna xwe de bibêjin polîsan bi zorê îfade ji wan girtine û wiha hat gotin: "Çîftçî û Durdu pêşî di navbera xwe de axivîne piştre jî ji Encu û Înal re gotine ku hûnê bibêjin bi zora polîsan wan der heqê doz KCK'ê ya Rihayê de îfade dane. Li ser vê yekê kamera vekirine û tiştên ku Çîftçî û Durdu ji Encu re gotine, Encu li ber kamerayê dubare kiriye."