Kontrola bajarokê Raî yê Ezazê, di navbera komên çete yên ser bi dewleta Tirk ve, her gavê dest diguherîne.

Herî dawî, çeteyên DAIŞ'ê bajarokê Raî teslîmî çeteya Sûltan Mûrat a ser bi MÎT'ê kirin.

Li gorî agahiyên hatin bidestistin, çeteyên DAIŞ'ê duh êvarê bajarokê El Raî yê li Ezazê û embarên genim ên li herêmê, radestî çeteyên Tûgaya Sûltan Mûrat a ji aliyê MÎT'ê ve tê birêvebirin, kirin.

Çeteyên Tûgaya Sûltan Mûrat a bajarok teslîm girt, malbatên Kurd ên li herêmê ji malên wan derxistin.

Hat ragihandin, beşeke mezin a çeteyên DAIŞ'ê yên li vî bajarokî tevlî nava çeteyên Tûgaya Sûltan Mûrat a MÎT'ê bûn, ku ev çete di nava qaşo Koalîsyona Niştimanî ya Sûriyeyê de cih digirin.

Ji ber ku bajarokê Raî li ser sînorê Bakurê Kurdistanê ye, ji bo çeteyan di warê çûn û hatinê de gelekî girîng e. Çete alîkariya çek, cebilxane, lojîstîk a ji dewleta Tirk dibîne û sewqiyata çeteyan li vê derê dikin.