Cenazeyê gerîlayê HPG'ê Seyîthan Kaplan (Çekdar Botan) ê di şerê li navçeya Amed Farqînê de jiyana xwe ji dest da, li taxa Suphan a navçeya Wan Artemêtanê hat veşartin. Cenazeyê Kaplan ji aliyê girseyeke qelebalix ve ku rêveberên MEYA-DEr, HDP û DBP'ê jî di nav de hebûn, ji Morga Goristana Akkopru hat wergirtin û ji bo bibin cihê lê defn bikin xistin ambûlansê. Darbesta cenaze li pêşiya taxê ji aliyê bi sedan kesî ve hat pêşwazîkirin. Girseya gel li vê derê darbest hildan ser milan û bi qîrîna dirûşmên "PKK gel e gel li vir e", "Şehîd namirin" ber bi goristanê ve meşiya. Bi dehan maşînên zirxî yên rejîma Tirk dor li taxê girtin û hewldan provokasyonê derxînin. Tevî vê yekê jî girseya gel meşa xwe temam kir.

Piştî veşartina cenaze, deqeyek rêz hat girtin û Hevserokê MEYA-DER Şaxê Wanê Îdrîs Şaybak axivî. Şaybak got, "Êşa me mezin e, bes em bi serbilind in."

Parlamenterê HDP'ê Lezgîn Botan jî da xuyakirin, ku gelê di rojên zor û zehmet de ye û destnîşan kir, ev rojên zehmet bi ruhê yekîtî û mezinkirina têkoşînê dikarin ji holê werin rakirin. Botan diyar kir, gelekî rêxistinbûyî bi qetilkirin û girtinê nikare bê bêdengkirin û got, "Roj wê bê hem li vê cîhanê hem jî li ya din, wê hesabê kiryarên xwe bidin."

Bav Seracettîn Kaplan jî destnîşan kir, ku kurê wî di oxira azadî û rûmetê de jiyana xwe ji dest daye û got, "Kurê min şehîdê tevahiya Kurdistanê ye."

Piştî merasîmê girseya gel berê xwe da gundê Darisina Jor a Şaxê û sersaxî ji malbatê re xwest.