Li paytexta Norwêc Osloyê Kurdan tevî dostên xwe li Navenda Çanda Kurd a Osloyê 1'ê Mijdarê Roja Kobanê ya Cîhanê pîroz kirin.

Çalakî ji aliyê Sol-Kurd (Solidaritet med Kurdistan) û Nûnertiya Rêveberiya Xweser a li Norwêcê ve hate lidarxistin. Gelek Kurd û Norwêcî tevlî bûn. Di çalakiyê de fîlmê li ser Kobanê hate nîşandan.

'GELÊ KURD BI WÊREKIYEKE MEZIN RÛMETA MIROVAHIYÊ PARAST'

Hevserokê Sol-Kurd Truls Strand got, "Jin û ciwanên Kurd bi berdêla jiyana xwe, ji bo mirovahiyê berxwedaneke mezin kirin. Ev berxwedana bêhempa weke berxwedana parastina mirovahiya azad û rûmeta mirovahiyê kete nava rûpelên dîrokê. Berxwedana Kobanê wêrekiya mirovan di asta herî bilind de nîşanî me Ewropiyan da."

Truls got, "Bi têkçûna dijminê mirovahiyê DAÎŞ'ê re li Rojhilata Navîn û cîhanê ji bo gelên bindest hêviyeke nû, modeleke nû ya jiyana azad û alternatîf hate avakirin. Dewleta Tirk a ku endamekî NATO'yê ye nikare xwe li vê rabigire û ji cihê ku DAÎŞ'ê hiştiye, êrîşan dike."

Nûnera Rêveberiya Xweser a li Norwêcê Şîlan Kobanê belavoka bi Norwêcî xwend, dostê Kurd, nivîskar û parlamenterê berê Erling Folkvord jî axivîn.

Di çalakiyê de Welat Kobanê û Ciger Kobanê hunera xwe pêşkêş kirin.