Kurdên li Rûsyayê bi şahiyan Salvegera 39'an a Pêngava 15'ê Tebaxê pîroz dikin.

Piştî herêmên Moskow û Saratovê, vê carê jî Kurdên li herêma Tambovê Pêngava 15'ê Tebaxê bi konserekê pîroz kirin. Kurd li bajarê Mîçûrînskê yê herêma Tambovê li hev kom bûn û destpêkê ji bo bîranîna şehîdan deqeyek rêz girtin.

Endama Tevgera Jinê Gulberîn Botan li konserê axivî û anî ziman ku Pêngava 15'ê Tebaxê ji bo gelê Kurd roja hebûnê ye.

Gulberîn Botan got, "Bi saya vê pêngavê ku bi rêbertiya Rêberê Gelê Kurd Abdullah Ocalan û pêşengiya fermandarê mezin Egîd (Mahsûm Korkmaz) de hate kirin, Kurdan îro hebûna xwe bi cîhanê dane qebûlkirin."

Di pîrozbahiyê de hunermendên Kurd Nesrîn Botan û Hecî Mûsa derketin ser dikê. Her wiha komên govendê yên herêmî Agirî, Şehîd Barîn û koma govendê ya zarokan Dîcle û Firat hunera xwe nîşan dan.