Greva birçîbûnê ya li paytexta Ewûstûrya Viyanayê ya ji bo piştgirîdayîna berxwedana grevên birçîbûnê bi mîtîngekê bidawî bû. Li bajarê Swîsre Bernê jî li nava Navenda Îstasyona Trenê çalakiyek hate lidarxistin.
Greva birçîbûnê ya 5 rojan a li paytexta Ewûstûrya Viyanayê û çalakiya konvedanê ya ji bo piştgirîdayîna berxwedêrên greva birçîbûnê duh bidawî bû.
Greva birçîbûnê û çalakiya kon vedanê ya 25’ê Adarê li Viyanayê hatibû destpê kirin, duh li pêşiya Parlamenta Ewûstûryayê bi mîtîngekê bidawî bû.
Gelek Kurdistanî, antî-faşîstên Ewûstûryayî û pêkhateyên HBDH’ê beşdarî mîtîngêbûn.
Komîteya amadekar a çalakiyê ragihand ku roja 1’ê Nîsanê bi armanca piştgirîdayîna greva birçîbûnê ya li Strasboûrgê wê bi beşdarbûna koma ku ji 30 kesan pêk tê greva birçîbûnê ya 5 rojan bidin destpê kirin.
BERN
Li bajarê Swîsre Bernê lîstikvanên Atolyeya Şanoya TEV-ÇAND’ê duh çalakiyek lidarxist.
Li Navenda Îstasyona Trenê bi zimanê Elmanî şanoyek hate pêşkêş kirin. Di lîstika şanoyê de balhate kişandin li ser tecrîd û grevên birçîbûnê.
Welatiyên li derdor eleqeyek mezin nîşanî çalakiyê dan û meclîsên jinan a Mizgin û Arîn Mîrkan ên Bernê li erbaneyan dan û stran strîn.
