Nûnerta Taybet a Iraqê ya Neteweyên Yekbûyî (NY) Lîse Grande diyar kir, DAIŞ'ê bi qasî 300-400 malbat mecbûr hiştiye li hin cihên Fellûceyê bimînin. Grande da xuyakirin, ku ev agahî ji çavkaniyên pê bawer hatine wergirtin û anî ziman, destûr ji gel re nayê dayîn qadên kombûnê yên li navenda bajêr biterikîne.

Lîse Grande ragihand, DAIŞ bi bikarnîna sivîlan hewl dide xwe ji êrîşan biparêze û hişyarî da, ku bi sedan malbat di nava rewşeke xetere de ne.

Artêşa Iraqê û Milîsên Şîa roja Duşemê ji sê baskan ve, ber bi bajarê Fellûce yê ji aliyê DAIŞ'ê ve hatiye dagirkirin, operasyonek dabûn destpêkirin. Li vî bajarê ku ji destpêka sala 2014'an û vir ve di bin dagirkeriya DAIŞ'ê de ye, şer dewam dike. Çeteyan duh êrîşeke dijber lidar xistibûn.

Saziya alîkariyê ya bi navê Konseya Penaberan a Norwêcê (NRC) ku alîkariyê dide gelek kampên penaberan ên li nêzî Fellûceyê hiyarî da, ku li bajêr pêkan e drameke însanî biqewime. Nûnerê NRN Nasir Muflahî da xuyakirin, ku ji roja destpêkirina operasyonê û vir ve bi tenê 550 malbatan karîbûn Fellûceyê biterikînin diyar kir, li nava bajêr pirsgirêkeke giran a xwarin, vexwarin û dermanan heye.