Ciwanekî Kurd ê bi navê Baran Toktaş reda xwe ya wicdanî îlan kir û got, "Weke ciwanekî Kurd, ez naxwazim xwîna xuşk û birayên xwe birijînim, naxwazim bi tecawizkaran re li aliyekî cih bigirim, naxwazim bibim leşkerê çek û mîlîtarîzmê, ez mirin û kuştinê red dikim."

Baran Toktaş bi daxuyaniyeke nivîskî reda xwe ya wicdanî îlan kir. Toktaş di daxuyaniya xwe de diyar kir ku ew pergala kapîtalîst û mîlîtarîzmê red dike û got, "Di vê pergala ku bazirganên çekan dewlemend dikin û mirovan bi hev didin kuştin de, ez naxwazim xwîna xuşk û birayên xwe birijînim, naxwazim bi tecawizkaran re li aliyekî cih bigirim, naxwazim bibim leşkerê çek û mîlîtarîzmê, ez mirin û kuştinê red dikim."

Toktaş da xuyakirin ku ewê nebe aliyekî vî şerê qirêj ê tê de zarok li destavêtina leşkeran rast tên, Ceylan, Ûgûr, Mizgîn û Baran têne kuştin û got, "Na naxwazim bibim alîgirê sîstema ku bi balafirên F-16 yên şer 34 welatiyên me kuştine, sivîlên hatine kuştin sûçdar dibîne û bi çekên kîmyewî xwezaya me tine dike."

Toktaş diyar kir ku eger bi vê îlankirina reda wicdanî re ew li dadgehên leşkerî were darizandin, ev yek wê ne adil be û di dozên heta niha dewam dikin de jî, ev yek tê dîtin. Toktaş got, "Hejmara leşkerên 'xwe dikujin' bi taybetî jî hejmara ciwanên Kurd ên li leşkerî dimirin-tên kuştin, gelekî zêde ye. Ev rewş bi tena serê xwe reda min a wicdanî mafdar nîşan dide."