Parlamentera Qersê ya BDP’ê Mulkiye Bîrtane anî ziman ku li Tirkiyeyê 977 hezar û 872 mayînên ku divê bên îmhakirin hene û pirsên “Wê xebatên paqijkirina mayînan kengî destpê bikin? Tirkiye di çarçoveya Peymana Ottowa de kîjan berpirsiyartî bi cih anîn?” ji Serokwezîr Recep Tayyîp Erdogan kir.                                                                                                         

Parlamentera Qersê ya BDP’ê Mulkiye Bîrtane têkildarî mayînên li Tirkiyeyê pêşniyarpirsek nivîskî da Serokwezîr Recep Tayyîp Erdogan. Di pêşniyarpirsê de tê destnîşankirin ku li gor daneyên fermî yên ji sala 1998’an û vir ve ji aliyê Hêzên Çekdarî ya Tirk (TSK) ve xebatên çandina mayînan hatiye bidawîkirin û dest bi paqijkirina qadên mayînkirî hatiye kirin. Bîrtane diyar kir,  "Li herêma sînorê di navbera Tirkiye û Sûriyeyê de di rewşa heyî de dîsa li gor heman agahiyan 613 hezar û 715 mayîn hene. Ji  mayînên ser sînor di sala 2008’an de 479 mayîn, mayînek jê di sala 2009’an, 1254 mayîn jî di sala 2011’an de hatine rakirin.”     

LI GOR DANEYÊN FERMÎ 977.872 MAYÎN HENE

Bîrtane, têkildarî mijarê xwest Erdogan bersiva van pirsan bide: "Li gor agahiyên fermî, 977 hezar û 872 mayînên ku divê werin tunekirin hîn jî hene. 613 hezar û 715 mayînên ku tê gotin di navbera sînorê Tirkiye û Sûriyeyê de ye di nav vê hejmarê de ye? Mayînên stokkirî teqez hatine tunekirin? Li  gor  agahiyên Wezareta Parastinê  ji ber gengeşeyên li Sûriyeyê îhaleya paqijkirina mayînan hatiye betalkirin.  Bi kîjan sedeman îhaleya rakirina mayînan hatiye betalkirin? Tirkiye ji ber çi sedeman paqijkirina mayînan daye rawestandin?  Wê li Tirkiyeyê kengî xebatên paqijkirina mayînan dest pê bikin? Tirkiye di çarçoveya Peymana  Ottowa de kîjan berpirsiyartî bi cih anîne?"