Piştî ku Yekîneyên Parastina Gel (YPG) bajarê Til Koçerê ji destê komên Eniya El Nusra/DAIŞ rizgar kirin, jiyana herêmê asayî bû û welatiyên herêmê dest bi çandina erdên xwe kirin.

Komên çete yên DAIŞ/Eniya El Nusra ku li bajarê Til Koçer û derdora wê bi cih bûbûn, rê nedan welatiyan ku kar û barên xwe bikin û erdên xwe biçînin. Ji ber zext û kiryarên çeteyan gelek welatiyên herêmê erdên xwe berdan û koçber bûbûn. Piştî ku Yekîneyên Parastina Gel (YPG) roja 26'ê Cotmehê bajarê Til Koçerê rizgar kirin û herêm ji mayin û  teqemeniyan paqijkirin, jiyana herêmê asayî bû, welatiyên herêmê dest bi çandina erdên xwe kirin.

Welatiyê bi navê Hesen Elî ku beriya niha ji ber zextên çeteyan ji herêmê koçer bûbû û niha vegeriya mala xwe  û erdê xwe diçîne diyar kir ku komên çeteyan zext li welatiyan dikirin û ew ji malên wan derdixistin. Ji aliyê din erdên çandiniyê şewitandin û mayin lê bicî kirin. Elî  da zanîn ku  komên çeteyan alavên çandiniyê û tovê di malan de jî talan kirine. 

Elî Hesen da zanîn ku piştî YPG'ê  herêmê ji wan koman rizgar kir wan dest bi çandiniyê kirine û wiha got;  "Ji ber YPG hemû pêkhateyên herêmê diparize, em jî bi dilek geş diçin ser erdê xwe. Niha me dest bi çandina genim û ceh kirine û şervanên YPG’ê jî alîkariya me dikin.”