Bi hezaran welatiyên bajarê Helebê yên Kurd, Ereb, Tirkmen û Suryan, her wiha şervanên YPG, YPJ, HPC′ê, Hêzên Asayîşê û Endamên Saziyên Sivîl û Xizmetê yên taxa Şêxmeqsûd a Helebê, beşdarî meşa azadiyê bûn û komploya li dijî Rêberê gelê Kurd Abdullah Ocalan şermezar kirin.

Meşvanan wêneyên Rêberê Gelê Kurd Abdullah Ocalan, alên YPG û YPJ′ê hildan û soza domandina têkoşînê heta azadiya Ocalan, nû kirin.

Meş ji pêşiya hola civînan a dikeve rojavayê taxa Şêxmeqsûd dest pê kir û li qada Şehîdan a li rojhilatê taxê rawestiya. Li wir deqeyek rêz hat girtin, piştre Endama Rêveberiya Meclîsa TEV-DEM′ê Nêrgiz Bekir, Endama Rêveberiya Kongreya Star Sîham Bîlal, Hevseroka MSD-Heleb Fehîme Hemo û Endamê Rêveberiya YCR′ê Ednan Hesen axivîn.

Di axaftinan de bal hat kişandin ser girîngiya serhildana gelê Kurd li hember siyasetên dewleta Tirk a faşîst ên li hember Rêbertiyê û da zanîn ku dewleta Tirk bi riya tecrîda li ser Ocalan hewl dide gelê Kurd qir bike û hemû gelên azadîxwaz bêdeng bike.

Di berdewama axaftinan de soza domandina têkoşînê ji bo azadiya Ocalan hat dayîn û bang li civaka navneteweyî hat kirin ku bila zextan li ser dewleta Tirk bikin da ku Ocalan azad bibe.

Meş bi dirûşmeyên daxwaza azadiya Ocalan bi dawî bû.