Li dijî Komkujiya Parîsê ya 2’emîn, gundê Areksê yê herêma Almavîrê ya Ermenistanê çalakî hat lidarxistin. Di çalakiyê de alên Rêberê Gelê Kurd Abdullah Ocalan, PKK û KCK’ê û wêneyên şehîdên Komkujiya Parîsê ya 2’emîn hatin hildan. Kurdistanî û dostên wan beşdarî çalakiyê bûn.

Parlemanter Kinyaz Hesanov, Endama Yekîtiya Jinên Azad Çîçek Rizgar, Hevserokê Komîteya Kurdistanê Silo Dirboyan û Endamê Komîteya Kurdistanê Mîlo Keleşyan jî li cihê çalakiyê amade bûn û axivîn. Di axaftinan de hat diyarkirin ku Komkujiya Parîsê ji aliyê Enqereyê ve hatiye plankirin û wiha hate gotin: “9’ê Çileya 2013’an komkujiyek bi heman awayî li Fransayê pêk hat ku di encamê de sê jinên têkoşer Sara, Rojbîn û Ronahî şehîd bûn. Dewleta Fransa ji bo ku hevkariya wê ya bi dewleta Tirk re dernekeve, çi ji destê tê dike û bi ser komkujiyê de dinixûmîne. Em wek gelê Kurd bang li dewleta Fransa dikin ku bila vê komkujiyê ronî bike û nebe hevkarê dewleta Tirk.”

Çalakî bi berzkirina dirûşmeyên “Jin jiyan azadî”, “Bijî Serok Apo”, “Şehîd namirin” û “Faşîst Erdogan” bi dawî bû.