Li bajarê Hannover ji bo salvegera her du Elmanyayan ku pîrozbahî tên lidarxistin bi meşeke alternatîf berxwedana Kobanê hat destekkirin.  Di meşa ku bi dehezaran beşdar bûn daxuyaniyek hat xwendin û êrîşên çeteyan hatin şermezarkirin.

Bi wesîleya salvegera her du Elmanya gihiştine hevdu her sal li eyaletekê pîrozbahî tên lidarxistin. Navenda pîrozbahiyên îsal eyaleta Saksonyaya Jêr e. Serokkomar Joachîm Gauck û Serokwezîr  Angela Merkel jî ku beşdarî pîrozbahiyên îsal bû, li Hannover îro meşeke alternatîf hat lidarxistin.

Di meşa ku ji aliyê 50 komên çep-sosyalîst û antîfaşîst hat organîzekirin polîtîkayên aborî û civakî yên Elmanya hatin şermezarkirin.  Navenda Civaka Demokratîk a Kurd a Elmanya (NAV-DEM) û pêkhateyên Yekîtiya Hêza Demokratîk destek dan meşê.

DI MEŞÊ DE BI HEZARAN BELAVOK HATIN BELAVKIRIN

Li cihê meşê ku ji dehezaran zêdetir kes beşdar bûn, daxuyaniya hevpar a NAV-DEM, FÊK, YXK û Ciwanên Azad hat xwendin.

Di daxuyaniyê de hat gotin ku çeteyên DAIŞ Kobanê dorpêç kirine û her deqeya diçe krîtîk e. Banga hestyariyê li raya giştî ya Elman hat kirin.

Di meşê de posterên Rêberê Gelê Kurd Abdullah Ocalan û alên PYD’ê hatin hildan. Her wiha bi hezaran belovekên ku têde behsa rewşa Kobanê dike hatin belavkirin.