Di rûniştina dozê de ya bi îddîaya ‘endama rêxistinê ye’ ya li hemberî Hevseroka Giştî ya HDP’ê Pervîn Bûldan hatibû vekirin, heyeta dadgehê daxwaza ‘bila darizandina wê were sekinandin’ red kir.
Ji ber daxuyaniyên çapemeniyê û çalakiyên ku tevlî wan bûye doz li Hevseroka Giştî ya HDP’ê Pervîn Bûldan hatibû vekirin.
Bi îddîaya ‘endama rêxistinê ye’ derbarê Bûldan doz hatibû vekirin. Rûniştina 11’emîn a li derbarê Bûldan li Dadgeha Cezayê Giran a Enqereyê ya 18’emîn hate kirin. Bûldan tevlî rûniştinê nebû.
Kenan Maçoglû yê ku parêzerê Bûldanê ye, biryara derbarê parlementerê HDP’ê Omer Farûk Gergerlîoglû bi bîr xist û got “Biryar gelekî eşkere ye û ji nîqaşkirinê re girtiye. Biryar diyar dike ku di qanûnan de valatiyek heye û nabe ku parlementerek were darizandin. Divê ev darizandin were sekinandin. Berevajî wê hûn ê sûc bikin.”
Heyeta dadgehê daxwaza parezêran a bila darizandin bisekine red kir û rûniştin taloqî 16’ê Sibata 2021’an kir.
