Di encama dozeke Serdozgeriya Komarê ya Bakirkoyê de biryara girtina Komeleya Şopandina Koçê (GOÇÎZDER) hate dayin, ku biryar di pêvajoya dadgeriyê de derbasî qonaxeke nû bû.

Daîreya Hiqûqê ya 4'emîn a Dadgeha Edliyeyê ya Herêma Stenbolê li ser îtiraza têkildarî Dadgeha Hiqûqê ya Esliyeyê ya 15'emîn a Bakirkoyê ya ji bo fesixkirina komeleyê biryara xwe da.

Dadgeha Îstînafê biryara dadgeha herêmî li gorî hiqûqê dît û erê kir. Rêveberî û parêzerên komeleyê piştî vê biryara îstînafê dosya xistin rojeva Dadgeha Bilind û pêvajoya temyîzê dan destpêkirin.

DADGEHA HERÊMÎ PÊNASEYA 'ZILMÊ' WEKE BIÇÛKXISTINA DEWLETÊ DÎT

Dadgeha Hiqûqê ya Esliyeyê ya 15'emîn a Bakirkoyê ku biryara girtinê da, di biryara xwe ya hincetê de karên komeleyê bi giranî weke sûc nîşan da. Dadgehê îdîa kir ku GOÇÎZDER li gorî armanc û îdeolojiya 'rêxistina terorê' tevgeriya ye, rastiya koçê ji rastiya Rojhilat û Başûrorjhilat ê Anatoliyê cuda nirxandiye û weke karekî yekalî yê ajîtasyon û reşkirinê bi kar aniye.

Hate îdîakirin ku pênasekirina operasyonên dewletê ya bi navê 'zilm'ê biçûkxistina saziyên dewletê ey û ev yek weke yek ji hincetên herî xurt ên biryara fesixkirinê nirxand.

PÊVAJO DI ROJEVA DADGEHA BILIND DE YE

Hiqûqnasên GOÇÎZDER'ê biryara erêkirinê ya îstînafê qebûl nekirin û ji bo lêkolînkirina temyîzê dosya pêşkêşî Dadgeha Bilind kirin.

Rêveberiya komeleyê diyar kir ku raporên koçê yên hatin amadekirin di çarçoveya azadiya fikrî û karê akademîk de ne, li gel biryarên beraatê yên dozên cezayê daxwaza girtina komeleyê zextek li ser civaka sivîl e.