Komeleya Mafên Mirovan (ÎHD) a Şaxa Îzmîrê ku ji du hefteyan carekî çalakiya “Bila winda bên dîtin û faîl bên darizandin” li dar dixe, vê hefteyê jî berdewam kir. Rêveberên ÎHD, malbata Mihyaz, nûnerên rêxistinên sivîl û partiyên siyasî tev li çalakiyê bûn. Di çalakiyê de pankartên “Winda wijdan in xwedî li wan derkeve” û “Faîl diyar in winda li ku ne?” hatin hildan. Vê hefteyê li kujerên Serokê Rûmetê yê Sendîkaya Xizmetên Hemû Şaredariyan û Rêveberiyê (Tum Bel-Sen) ê Şaxa Îzmîrê Îkram Mihyaz hate pirsîn. Mihyaz di 5’ê Tîrmeha 1994’an piştî ku hatibû revandin, hatibû qetilkirin.

Rêveberê ÎHD’a Îzmîrê Caner Canli daxuyanî xwend û anî ziman ku li gel 29 sal derbas bûne jî hê jî kujerên Îkram Mihyaz nehatine dîtin û dosyeya wî ji ber demboriya 20 salan hatiye girtin. 

Canli bal kişand ser destgîrkirin û qetilkirina Mihyaz û xwest demboriya li ser dosyeya wî bê rakirin û kujer û faîl bên darizandin. 

Piştî daxuyaniyê ji bo aqûbeta windayan çalakiya rûniştinê hat lidarxistin.