Yekîtiya Xwendekarên Kurdistanê (YXK) bi daxuyaniyeke nivîskî komploya navneteweyî şermezar kir.

Di daxuyaniyê de hat ragihandin ku Rêberê Gelê Kurd Abdullah Ocalan li Girtîgeha Îmraliyê, li hemberî pêkanînên 'tecrîda giran û îşkenceya spî' berxwedaneke mezin nîşan dide û ji bo çareseriya aştiyane û wekhev a pirsgirêka Kurd têdikoşe.

'JI BO PÊŞEROJA HEVPAR A GELAN MANÎFESTO NIVÎSAND'

YXK'ê diyar kir ku Ocalan ji bo pêşeroja hevpar a gelan di Newroza 2013'an de manîfestoyek pêşkêş kiriye û got, "Li dijî hemû rêbazên îzolasyonê, Birêz Ocalan bi parêznameyên xwe re di şexsê Tevgera Azadiyê ya Kurd de, paradîgmaya civaka demokratîk, ekolojîk û azadîparêziya jinê pêşkêşî tevahiya mirovahiyê kiriye."

Di daxuyaniyê de hat gotin, "Şoreşa ku îro li Rojava tê jiyîn û bandora xwe li tevahiya cîhanê kiriye de, encameke xebatên pêvajoya Rêberê Gelê Kurd Abdullah Ocalan a li Sûriyeyê û encameke paradîgmaya li Îmraliyê bi pêş ketiye." Di daxuyaniyê de komplo hat lanetkirin û azadiya Ocalan hat xwestin.

YXK'ê diyar kir ku ew ê ji bo azadiya Ocalan û çareseriya aştiyane ya pirsgirêka Kurd, têkoşîna xwe xurt bikin.