Bi sedan şêniyên bajarê Amûdê û gundewarên wê bi armanca wergirtina cenazeyê têkoşer, li pêşiya navenda Heyva Sor a Kurd kom bûn. Şêniyan cenazeyê Şervanê YPG’ê Mesud Omer (Ceger Sadiq) ê ku di 12’ê Îlonê de li gundê Ezawî yê girêdayî herêma Şedadê jiyana xwe ji dest dabû, wergirtin û ber bi goristana Şehîd Îsmaîl Hogir ve ketin rê.

Welatiyan alên YPG/YPJ’ê  û wêneyên Rêberê Gelê Kurd Abdullah Ocalan hilgirtin. Her wiha dirûşmeyên ‘Şehîd Namrin’ berz kirin.

Li goristanê şervanan cenazeyê têkoşer hilgirtin ser milên xwe û derbasî cihê merasîmê kirin. Paşê Endamên Erka Xweparastinê merasîma leşkerî li dar xistin.

Piştre Endamê Meclîsa Malbatên Şehîdan Zîwer Elî, Endamê Tevgera Civaka Demokratîk Selman Şêxê û Apê Têkoşer Ebdo Omer, axivîn.

Axaftvanan sersaxî ji malbata servanê YPGꞌê Ceger Sadiq re xwestin û gotin ku destkeftiyên ku îro li Rojavayê Kurdistanê hatine bidestxistin, hemû bi saya xwîna şehîdan e û soza şopandina riya têkoşeran nû kirin.

Paşê nasnameya têkoşer hat xwendin û radestî malbata wî hat kirin. Di dawiya merasîmê de cenazeyê Têkoşer Ceger Sadiq di nava tilîlî û dirûşmeyan de hate definkirin.