Li Zanîngeha Silêmaniyeyê jî, mamosteyan dest bi boykotê kirin.

Hîndekarên Zanîngeha Silêmaniyeyê dan xuyakirin, ku ji ber heqdestên wan ev 5 meh in nayên dayîn, wan dest bi çalakiya boykotê kirine. Mamoste, heta mafê xwqe werbigirin, ew ê dersê nekin.

'EM BI BIRYAR IN'

Hîndekarê Fakulteya Ragihandinê ya Zanîngeha Silêmaniyeyê Kamil Umer li ser mijarê daxuyaniyek da û anî ziman ku heta mafên wan ji aliyê hikûmetê ve neyên dayîn ew ê nekevin dersan. Umer got, "Weke mamosteyên zanîngehê me di nava xwe de biryar stendin. Heta em mafên xwe werbigirin, em ê çalakiya boykotê bikin û dersê nedin. Di van çalakiyê de xwe de em bi biryar in."

Umer da xuyakirin ku bi qasî 5 meh in ew nikarin meaşên xwe werbigirin û got, "Em ê nebin lîstika desthilatdariya siyasî ku dixwaze mamosteyan bê qîmet bike."

'EM WAN WEKE NÛNERÊN XWE NABÎNIN'

Umer diyar kir ku hin mamosteyên xwe weke nûnerên wan nîşan didin, dadikevin qadan û dixwazin çalakiyên wan qels bikin û got, "Em wan weke nûnerên xwe nabînin."

Li gelek bajar û navçeyên Başûrê Kurdistanê mamoste, ji ber ku nikarin mehaneyên xwe werbigirin, ev demeke dirêj e dibistanan boykot dikin.