Li Şirnexê êrîşên hêzên rejîma Tirk ên li hemberî berxwedana xwerêveberiyê ev 7 roj in bênavber dewam dikin. Hêzên rejîmê yên hewl didin bikevin nava taxan, êrîşên wan bi berxwedana YPS û YPS Jin re tên şikandin.

Ji saetên şevê ve bi topan bi awayekî dijwar êrîş li taxên berxwedêr tê kirin û di encama topbaranê de gelek avahî hatin şewitandin û hilweşandin. Her wiha wesayîtên zirxî yên li derdora taxên berxwedêr hatine bicihkirin jî taxan gulebaran dikin. Li ser vê topbaran û êrîşên hêzên dewletê, li taxên Yeşîyûrt û Dîcleyê endamên YPS û YPS-JIN'ê jî bersiv dan van êrîşan. Piştî bersivdayînê li taxan şerekî derket û ev şer dewam dike.

TEVGERA AMBÛLANSAN

Bi şer re hat ragihandin ku gelek kuştî û birîndarên hêzên dewletê hene. Gelek ambûlansan berê xwe dan qada şer. Her wiha hat dîtin ku tevgera ambûlansan herî zêde li taxên Yeşîlyûrt, Gazîpaşa û Îsmetpaşayê xwe didin der. Ambûlansên ji taxan vedigerin berê xwe didin 23. Fermandariya Tumena Jendermeyan a Sînor. 

ENDAMA YPS JIN JIYANA XWE JI DEST DA

Kordînasyona Giştî ya YPS û YPS-JIN’ê der barê şerê li Şirnexê de daxuyaniyeke nivîskî weşand. Di daxuyaniyê de koordînasyon ragihand ku di şerê li taxa Dîcleyê de endama YPS-JIN'ê Gûrbet Kaya bi nasnav Jiyan Amargî jiyana xwe ji dest daye. 

Di daxuyaniyê de wiha hat gotin: 

"Êrîşên hêzên dewletê li ser taxa Dîclê giran dibin. Tax bi tank û hawanan tê topbarankirin. Hêzên dewletê yên ku dîwarên avahiyan hildiweşînin, bi bersivdayîna YPS û YPS-JIN'ê şer rû didin. Di vî şerî de endama YPS û YPS-JIN'ê Gûrbet Kaya jiyana xwe ji dest da."