Çalakiyên xelkê Silêmaniyê ji bo piştgirî û piştevaniya bi berxwedana Rojavayê Kurdistanê û şermezarkirina êrişên li ser Rojava, berdewamin.

Di heman çarçoveyê de li ber Baxê Giştî yê li kolana Salim a bajarê Silêmaniyê, meşek girseyî bi dirûşmeya ‘Bijî Berxwedana Rojava’ û ‘Jin, Jiyan, Azadî’ hate lidarxistin.

Bi hezaran kesan bi yek dengî piştevaniya xwe ji gelê Kurd ê Rojavayê Kurdistanê dubare kirin. Xwepêşanderan daxwaz û banga rawestandina êriş û dagirkeriya li ser Rojavayê Kurdistanê kirin.

Her wiha tekezî kirin ku hertim wê li gel xwişk û birayên xwe yên Rojava bin û bang li civaka navneteweyî kirin ku li beramberî êrişên li ser herêmên sivîl û saziyên xizmetgûzariyê bêdeng nemînin û helwest nîşan bidin.

Biryare di çarçoveya berdewamiya çalakiyên piştevaniyê de, sibe (Înê) di saet 14:30’an de li ber Baxê Giştî xwepêşandanek mezin were lidarxistin.