Komîteya Têkiliyên Derve ya KCK'ê da xuyakirin, ku di rojên dawî de li bajarokê Xûrmatû yê ser bi parêzgeha Selahadînê, di navbera hêzên pêşmerge û milîsên Şîa Heşd El Şebî de şer diqewime û ji her du aliyan mirî û birîndar hene. Komîteya Têkiliyên Derve da xuyakirin ku ev şer ji bilî zêdekirina wêranî û êşa bi salan a gel û komên baweriyan ên li Iraq û Başûrê Kurdistanê ti encamê bi xwe re nîne û destnîşan kir, ku ji ber vî şerê rû dide ew bi fikar in.

Di daxuyaniya KCK'ê de hat gotin, "Xuya ye, di demeke ku li Iraq û Başûrê Kurdistanê hînê gefa DAIŞ'ê dewam dike de, li hember hev rakirina hêzên divê bi hev re li dijî DAIŞ'ê şer bikin, provokasyonek e. Ev şer bi kêrî Iraqiyên Şîa û Sûnî, bi kêrî Kurd, Ereb, Tirkmen û Asûriyan nayê. Berevajî, di encama vî şerî de wê DAIŞ hinekî din bêhnê vede û hêzên li ser pêşeroja Iraqê xwedî hesabên tarî ne, wê hîn bêhtir bibin xwedî derfet ku pêşeroja Iraq û Başûrê Kurdistanê tarî bikin. Ji xwe, provokatoran di hin êrîşan de kincên gerîla li xwe kirin û bi vî rengî dixwazin dorhêla şer fireh bikin."

Di daxuyaniya Komîteya Têkiliyên Derve ya KCK'ê de ev xusûs hat destnîşankirin:

"Em dixwazin vê yekê destnîşan bikin: Gerîlayên me yên ku îdeolojiya xwe li ser jiyaneke bi hev re ya li ser bingeha hurmeta li nirxên demokratîk ên hemû gel û baweriyan ava kirine, bi vê nêrînê re bêyî cihêkariyê bixe navbera gelan û baweriyan her roj ji bo wan şehîdan didin, ti eleqeya xwe bi vî şerî re nîne. Li gorî bîr û baweriya me; Iraq û Başûrê Kurdistanê welatê hevpar ê hemû gel û baweriyên li vê derê dijîn e. Lewma avabûna jiyana hevpar ne bi şer û şîdeta ji ber mezhebî û netewperestiyê, ancax bi zîhniyet û sîstema demokratîk dikare bê avakirin. Bi vê bîr û baweriyê re em bang li hemû aliyan dikin ku bi berpirsyarî rabin, şer bisekinînin û pirsgirêkan bi rêbazê siyasî çareser bikin."