Operasyona Azadkirina Şengalê di roja duyemîn de bi hemû leza xwe didome. Êzidiyên ku li çiyayê Şengalê jî di bin banê “xweparastin”ê de çek hilgirtin û tevlî hêzên YBŞ’ê dikevin nav şer. Êzidiyên tevlî operasyonê bûne wiha axivîn: “Em ê tola xwe ji çeteyên DAIŞ’ê hilînin, ev ji salek zêdetir ev êş bi me dan kişandin, em ê keçên xwe yên di destê wan de dîl hatine girtin rizgar bikin. Em ê îro Şengalê ji destê çeteyên DAIŞ’ê rizgar bikin. Em ê tola dayikên xwe û xwişkên xwe hilînin.”

Şervanê YBŞ’ê Rûhat Şengal jî alîkariya Êzidiyên tevlî Operasyona Şengalê dibin dike, wiha got: “Em li vir pêdiviyên gelê me yê ji bo wezîfeya xweparastinê hatine yên çek û cebilxanê çareser dikin. Ji vir jî diçin navenda Şengalê û li wir li gel hevalên me yên di çeperan de tevlî pêngava Şengalê dibin.”