Li gorî agahiyên ji herêmê hatin wergirtin, Hêzên Suriyeya Demokratîk (HSD) operasyona ku duh dabûn destpêkirin didomînin. Di çarçoveya operasyonê de hêzên HSD'ê îro danê sibehê gundikê Şucae El-Faris ê li nêzî gundê Entakiya yê li başûrê herêma Til Hemîs ji çeteyan rizgar kirin.

Di şer de gelek wesayîtên çeteyan hatin rûxandin, bi dehan çeteyan hatin kuştin û cenazeyên 8 ji wan ketin destê şervanên HSD’ê.

Li aliyê din duh danê êvarê balafirên şer ên koalîsyona navneteweyî jî nuqteyên çeteyan ên li gundê Recim El-Hecana yê li başûrê Hesekê bombebaran kirin. Der barê encamên bomberanê de agahiyên zelal nehatin bidestxistin.

Hat ragihandin ku çeteyên DAIŞ’ê lastîkên wesayîtan û tiştên bi vî rengî dişewitînin da ku duxan rabibe û balafir cihên wan testpît nekin.

Li herêmê operasyona HSD'ê û pêş ve çûna wan didome.