HPG’ê ragihandin ku 11’ê Îlonê dema konvoyek leşkerî ji gundê Erbîşê yê girêdayî Çelê diçû qada Ertûşê li dijî wesayîta zirxî ya Kobra çalakiyek li dar xistine.

Navenda Ragihandin û Çapemeniyê ya HPG’ê daxuyaniyek nivîskî da, têkîldarî çalakiyên gerîla ev agahî parve kirin; “Roja 11'ê Îlonê saet di 09:30 de, hêzên me li dijî leşkerên li dora Tûgaya Çelê a Colemêrgê li hev civiya bûn û avahiyên li nava tûgayê, bi çekên giran çalakiyek pêk anîn. Di vê çalakiyê de 2 leşker hatin kuştin.

11'ê Îlonê saet di 11:00 de, hêzên me bi RPG-7 û çekên ferdî ji nêz ve li maşîneke zirxî ya bi tîpa Kobra xistin, ku ev maşîna zirxî tevî konvoyeke leşkerî ji gundê Erbîş ê Çelê diçû herêma Ertûşê. Di encama derbên hêzên me de maşîna zirxî îmha bû û leşkerên tê de mirin. Lê belê hejmara leşkerên mirin nehat zelalkirin.

LI QILEBANÊ BI ÇEKÊN GIRAN ÇALAKÎ

Hêzên me roja 11'ê Îlonê saet di navbera 13:00-13:30 de bi çekên giran li leşkerên li herêma Çeperên Şêxa ya li navçeya Qilaban a Şirnexê xistin. Hejmara leşkerên li vir mirin û birîndar bûn nehat zelalkirin.

Di çarçoveya Pêngava Şoreşger a Şehîd Xebat Aktepe de hêzên me roja 11'ê Îlonê saet di 18:30 de li herêma Şerefan a navçeya Elbak a Wanê, li çepereke qereqola Bibanê xistin. Li vir 2 leşker hatin kuştin.”

LI ÇOLETERÊN HATAY, OSMANIYE Û DÎLOKÊ OPERASYON

HPG’ê destnîşan kir ku artêşa Tirk li çoltera Osmaniye, Hatay û Dîlokê operasyon daye destpêkirin, û ev agahî parve kirin: “Artêşa TC li bejahiya Somaniye, Hatay û Dîlokê dest bi operasyonê kir. Roja 9'ê Îlonê, li deşta Hinizr a navçeya Îslahiye ya Dîlokê di navbera hêzên me û artêşa TC de şer derket.Hejmara leşkerên li vir hatin kuştin û birîndar bûn nehat zelalkirin. Yekîneyên veşartî yên artêşa TC li sêgoşeya Osmaniye, Hatay û Dîlokê kemînan datînin.”

DI BOMBERDÛMANA QENDÎLÊ DE ZERAR GIHIŞTIYE REZ Û BAXÇEYÊN GELÊ HERÊMÊ

Navenda Ragihandin û Çapemeniyê ya HPG’ê da xuyakirin ku 11'ê Îlonê saet di navbera 14:00-15:00 de balafirên şer ên artêşa TC bombe li girê Hîva yê li herêma Qendîlê ya Herêmên Parastinê yên Medyayê barandine û destnîşan kir ku ji ber bomberdûmanê zerar li dehl û rezên gundiyan bû.