Li navçeya Farqînê qedexeya kolanan di roja 8'emîn de berdewam dike. Berxwedana gel jî li dijî qedexeyan sînoran nas nake. Girseya ku Hevşaredarê Bajarê Mezin ê Amedê Firat Anli, aktîvîstên KJA'yê û wekîlên HDP'ê jî di nav de bi meşê ketin taxên ku kolan li wan hatine qedexekirin.

Li navçeya Farqînê ya Amedê ku 8 roj in derketina kolanan li welatiyan hatiye qedexekirin, berxwedana gel jî didome. Li navçeya ku di êrîşên tîmên taybet û polîsan a 8 rojan de 7 welatî hatin qetilkirin serhildana gel li dijî qedexeyan didome. Duh li navçeyê di êrîşa polîsan de welatiyên bi navê  Yakup Sinbag û Mehmet Gunduz hatin qetilkirin. Îro jî bi hezaran kesên di nav de Hevşaredarê Bajarê Mezin ê Amedê Firat Anli, aktîvîstên KJA'yê û wekîlên HDP'ê Nursel Aydogdu û Sîbel Yîgîtalp, Hevserokê DBP'ê Kamûran Yuksek û Hevseroka MHD'ê Prz. Gulşen Ozbek jî hene bi dirûşmên, "Bijî berxwedana Farqînê" meşiyan taxên Konak, Mescit û Tekelê. Dema girse ket nava taxan polîsan êrîş kir. Nêviyê girsê bi polîsan re şer kir û nêvî jî ketin nava taxê.