Cenazeyê fermandarê YPG’ê Diyar Bagok (Ekrem Bîlge) ê di berxwedana Kobanê de jiyana xwe ji dest da, ji aliyê deh hezaran ve li navçeya Nisêbîna Mêrdînê hat birêkirin.

Piştî şeş mehan cenazeyê Fermandarê YPG’ê Diyar Bagok ê di berxwedana Kobanê ya li dijî çeteyên DAIŞ’ê de, du rojan bi tenê di avahiya asayîşê de, li dijî çeteyên DAIŞ’ê bi lehengî şer kir, anîn Nisêbînê û bi merasîmeke girseyî spartin axê.

Piştî azadkirina navenda Kobanê, di encama lêgerîna di bin xirbeya avahiya Asayişê de, cenazeyê fermandarê YGP’ê Diyar Bagok derxisrtin û ji bo radestî malbatê bikin, anîn Deriyê Sînor ê Mûrşîtpinar û ji wir jî derbasî Pirsûsê hate kirin. Cenazeyê bi karwanekî wesayitan şandin Qoserê û ji wir jî ber bi Nisêbînê ve bi rê kirin.

Beriya hatina cenaze li Nisêbînê amadekariyên merasîmê hatibûn kirin, tevî hevserok û rêveberên HDP û DBP’ê yên Nisêbîn, Qoser û Mehsertê, û hevşaredar, bi deh hezaran kes tevlî merasimê bûn. Beriya merasîmê bi hezaran kesan berê xwe dan Qada Newrozê. Piştî cenaze gihişt Qada Newrozê, bi deh hezaran darbesta Bagok danîn ser milan û ber bi Goristana Şehîdgeha Nisêbînê ve dest bi meşê kirin. Di meşê de dirûşmên “Fermandar Diyar dijî Kobanê şer dike”, “Şehîd Namirin” û “Bijî Serok Apo” qîriyan.  Di meşê de alên YPG, PKK, KCK û posterên Diyar Bagok hatin hilgirtin.

Di meşê de her ku çû hejmara wan zêde bû. Cenaze bi fîşekên hewayî hate pêşwazîkirin. Girseyê bi yekdengî merşa “Çerxa Şoreşê” qîriya.

Nûnerê MEYA-DER ê Mêrdînê Latîf Tabar jî axivî û got: “Berxwedana lehengî ya Şehîd Diyar yekîtiya gelê Kurd xurt kir. Teslîmî çeteyên DAIŞ’ê nebû û berxwedanê xurt kir, mîraseke mezin ji me re hişt.”

Piştre kekê Diyar Bagok Hasan Bîlge axivî û peyama ku şervanên YPG’ê ji Kobanê ji wan re şandine parve kir. Şervanên YPG’ê di peyama xwe de dibêjin: “Em şervanên fermandar Diyar in. Fermandar Diyar di hemû şert û mercan de xeta me ya teslîmnebûnê ye. Em ê heta dilopa dawî ya xwîna xwe hewl bidin ku hewl bidin ku bibin hêjayê Fermandar Diyar. Wê xwîna Fermandar Diyar li erdê nemîne.”

Piştî axaftinan  cenazeyê DIyar Bagok spartin axê.