Endamê Konseya Serokatiyê ya Partiya Jiyana Azad a Kurdistanê (PJAK) Siyamend Mûînî şerê navbera DYE-ÎsraÎl û Îranê ji ANF'ê re nirxand û anî ziman ku Îran salên dûr û dirêj e di nava krîzeke piralî de ye, pirsgirêkên aboriyê, aciziya civakî û xitimîna siyasî sernavên sereke ne ku bandorê li paşeroja welêt dikin.

Siyamend Mûînî destnîşan kir ku ji ber vê yekê divê gelên li Îranê û hêzên demokratîk ji bûyerên di dema pêş de biqewimin re amade bin.

Mûînî işaret bi girîngiya lêgerîna diyalogê ya dema dawî û lihevkirina hêzên Rojhilatî yên ji bo hewldaneke hevpar û diyar kir ku ev hevkarî ji bo bilêvkirina bi xurtî ıya daxwazên gel û parastina wê, girîng e.

Mûînî got, "Gelê Kurd ji bo karibe firsendên paşerojê bi kar bîne divê di nava yekîtî û rêxistiniyê de be" û diyar kir ku karên siyasî divê ne tenê li ser bûyerên rojane, lê belê bi perspektîfeke stratejîk û demdirêj bêne kirin.

Siyamend Mûînî qala bandora bûyerên herêmî û navneteweyî ya li ser Îranê kir û anî ziman ku guherînên li Rojhilata Navîn û polîtîkayên aktorên navneteweyî divê bi baldarî bêne şopandin. Mûînî ragihand ku guherîna demokratîk tenê bi destwerdanên derve nabe ûu hêza esasî wê têkoşîna hevpar a gelên Îranê be.

Siyamend Mûînî destnîşan kir ku partiyên Kurd di pêvajoya demokratîkbûnê de ya li Îranê dikarin bi roleke pêşeng rabin û got, "Îrayeke civakî ya rêxistinbûyî û demokratîk a li Rojhilatê Kurdistanê bê afirandin ne tenê wê xizmetê ji têkoşîna azadiyê ya gelê Kurd re bike, di heman demê de wê tevkariyê li paşeroja demokratîk a gelên Îranê hemûyan bike. Ji ber vê jî gelekÎ girîng e ku hêzê siyasî û gelê Kurd ji pêvajoyên guherînê yên gengaz re xwe amade bikin."

Mûînî diyar kir ku misogerkirina mafên demokratîk ên Kurdan yekser bi demokratîkbûna gitşî ya Îranê ve girêdayî ye û ragihand ku li ser bingeha tevlîbûna demokratîk, azadÎ û wekheviyê divê sîstemeke siyasî ya nû bê avakirin.

Siyamend Mûînî anî ziman ku krîzên heyî yên li herêmê di heman demê de derfetên siyasî yên nû jî afirandiye û got, divê tevgera siyasî ya Kurd vê demê rast binirxîne. Mûînî anî ziman ku diyalog, rêxistinbûn û xurtkirina amûrên têkoşîna demokratîk yek ji wezîfeyên bingehîn ên demê ye û got, ji bo Kurdan guherîna demokratîk a li çar parçeyan tenê bi têkoşîna hevpar û piştevaniyê dibe.