Taylan Kahraman ji bo protestokirina Komploya Navneteweyî ya li hemberî Rêberê Gelê Kurd Abdullah Ocalan, 1’ê Kanûna 1998’an li bajarê Dusseldorf ê Elmanyayê bedena xwe da ber agir. Taylan Kahraman li cihê ku bedena xwe da ber agir, hat bîranîn.

Malbat û hevrêyên Taylan Kahraman û gelek Kurdistanî tevlî bîranînê bûn. Dayika Taylan Şenge Kahraman, li ser navê Komeleya Malbatên Şehîdan KOMAW bavê şehîd Cemîl Gultekîn û li ser navê Tevgera Jinên Kurd Jînda Denîz axivîn.

Di axaftinan de qala jiyan û girêdanbûna şehîd Taylan Kahraman a bi têkoşînê re hat kirin û hat destnîşankirin ku divê wate û peyama çalakiya Taylan hîn baştir bê xwendin, xwedî derketina li Taylan bi xwedî derketina li Abdullah Ocalan ve girêdayî ye.

Di bîranînê de dirûşmeyên “Şehîd namirin” û “Bijî Serok Apo” hatin berzkirin. Li cihê ku Taylan Kahraman çalakiya xwe lê kirî, gul hatin danîn û find hatin vêxistin.