Şahiya ku roja yekşemê hate lidarxistin, bi deqeyek rêzgirtinê dest pê kir. Siyasetmedarê Kurd Cuma Tak di pîrozbahiyê de axivî û diyar kir ku 27’ê Mijdarê ji bo gelê Kurd tê wateya “ji nû ve zayîn û vejînê”.

Cuma Tak got, “Ev dîrok, sembola biryardariya gelê me ye ku xwedî li nasname, ziman û çanda xwe derkeve” û bang li hemû qadan kir ku bi awayekî rêxistinî û bi têkoşîneke hevpar bisekinin.

Piştî axaftinan, hunermend Îbo Qamişlo, Kawa Urmiyê, Helbest Arî, Peywan Arjîn, Sîdar Amedî û Koma Newda Saarbrücken derketin ser dikê.

Di çalakiyê de ku stran û kilamên şoreşgerî hatin gotin, govend hate gerandin.

Di şevê de du komên cuda yên folklorê jî derketin ser dikê û bi kincên herêmî dîlanên gelêrî yên Kurdî pêşkêş kirin. Di dema pêşandanê de tilîlî hatin avêtin û çepik bênavber hatin lêdan.

Stantên pirtûk û kelûpelên herêmî yên di salona çalakiyê de hatibûn vekirin jî rastî eleqeyeke mezin hatin. Pirtûkên li ser dîroka Kurd, wêje, têkoşîna azadiya jinê û pêvajoya siyasî ya heyî, ligel berhemên destan, gihîştin beşdaran.

Çalakî, bi govenda dawî ya hat gerandin û bi dirûşmên “Bijî Serok Apo” bi dawî bû.

Organîzatoran peyama wê yekê dan ku 27’ê Mijdarê weke “cejna vejîna Kurdan” dê her sal bi awayekî hê xurtir û girseyîtir bê pîrozkirin.