Civaka Îslamî ya Kurdistanê, Koordîanasyona Ezîdiyan li derveyî welêt, Federasyona Elewiyan a Demokratîk, Platforma Yarsanan a Ewropayê, Platforma Horam a Ewropayê û Cebheya Feylî ya Ewropayê têkildarê meşa ku 12’ê Mijdarê wê li Dusseldorfê bê lidarxistin, daxuyaniyek nivîskî dan û banga tevlêbûna meşê kirin.

Daxuyanî wiha ye:

“Hûn xwedanê dergûşa mirovahiyê ne. Mirovahî, ji xaka pîroz Kurdîstanê derketiye. Ev xaka pîroz û gelê berxwedêr bi hezaran salan e, ji bo mirovahî nemire û tune nebe, li ber xwe dide. Ev welat û gel, gelek felsefe û baweriyan dihebîne û hebandine. Gelekî bawerî û ol ji nava vê xakê û gelî derketine. Kurdistan dergûşa ol û baweriyan e, bexçe û baxê civak û çandan e.

Îro neyarê Kurdan dixwaze wan li cîhanê tune bike. Li Bakur, Başûr, Rojava û Rojhilat bi bêexlaqî li qirkirinê dewam dike. Bi piştgiriya desthilatdarên bêwijdan, hemû curên fermanan li ser gelê me pêk tîne. Divê kesên oldar, niştimanperwer û xwedan wijdan bi erka xwe rabibin. Li welatê me yê pîroz qehremanên gelê me bi çekên kimyewî û bi awayên hovane tên qetilkirin. Divê Kurd, bawermendên rast û mirovên xwedan wijdan, biherikin bajarê Dusseldorfê.

Divê em bawermendên rast û durist jî, mirovahiyê bê xwedî nehêlin. Em wek bawerî û bawermendên Mezopotamyayê bang li hemû kesên xwedan wijdan dikin ku, roja 12’ê Mijdarê, deriyên xwe radin, cînar û dostên xwe bi rêxistin bikin û tev li vê meşê bikin.

Çawa ku hemû sazî û partiyên Kurdistanî roja 12 Mijdarê kirine roja greva neteweyî, ji bo piştgirîkirina doza azadîyê û rawestandina şerê qirêj, li dijî qirkirina keç û xortên Kurdan, divê em jî wê rojê wek rojeke rabûna li ber qirkirina Kurdan bi liv û tevger bibin. Bi kal û pîr, keç, xort, jin û zilam hemû bi hev re biherikin vê qadê. Divê hemû cîhan pê bihese, neyarê me yê hov, dixwaze di kesayeta gelê me, keç û xortên me de, hemû bawerî û mirovahiyê tune bike.

Werin em tev bi hev re xwedî li mirovahiyê derbikevin!

Werin em oldar û bawermendên Kurdîstanê bi hev re vê hovîtiyê riswa bikin!

Werin em tev bi hev re li welatê pîroz Kurdîstanê û berxwedêrên xwe xwedî derbikevin!“