Serokê Giştî yê Partiya Îslamiya Kurdistan (PÎK) Hîkmet Serbilind têkildarî êrîşên li ser gelê Kurd û berxwedana Rojava daxuyaniyeke nivîskî belav kir. Di daxuyaniyê de hat diyarkirin ku gelê Kurd her tim ji aliyê dagirkerên Kurdistanê ve bi navê ol, mesheb û îdeolojiya hatin xapandin û got, “Dijminên me ew kes in ku jiyana xwe û paşeroja xwe li ser înkar û tunekirina miletê me ava kirine. Kurdên misilman! Êdî bese em, herdem bi navê ummetê tên xapandin. Tirk, Ereb û Faris nasnameya me înkar dikin û li ser gelê me jenosîde bi kar tînin. Ew ummeta ku ew jê re dibêjin, ji dîktatorên kujer, diz û tecawizkaran re serî ditewîne û wan mîna xwedayan diparêze. Hin Kurdên misilman hê jî piştgirî didin wan kesên ku welatê wan talan dikin, dagir dikin û bi navê biratiya ummetê nasnameya wan înkar dikin.”

‘DIJMIN DIXWAZE DI NAVBERA KURDAN DE NAKOKIYAN DERXE’

Di daxuyaniyê de hat destnîşankirin ku li Rojavayê Kurdistanê, gel bi bedelên giran û bi canê xwe di rêya azadiyê de destketiyên mezin bi dest xistine û bi bîr xist ku ji bo astengkirina van destketiyan, Tirkiye û çeteyên HTŞ’ê Colanî bi hewldanên mezin li dijî gel şerekî qirêj bi kar tînin û wiha domand: “Dijminên gelê Kurd di navbera Kurdan de dîsa dixwazin nakokiyan ava bikin. Ger di navbera Kurdan de ji ber berjewendiyên rêxistinî nakokî çêbibin, ev ê ji bo miletê Kurd encamên wêranker bi xwe re bîne. Di dawiyê de, destketiyên ku Kurdan bi bedelên giran bi dest xistine, wê winda bibin.

Di hedîseke Pêxember de tê gotin: “Mirov du caran ji heman qulikê nayê gezkirin.” Pêwîst e em fitne û fesadên di navbera xwe de asteng bikin. Ev erkê me yê sereke ye. Kurdan ji ber ku her tim ji bo bawerî, mezheb û îdeolojiyan ji nasnameya xwe tavîz dane, ji ber vê jiyana zilletê jiyane. Divê em bibêjin: “Ez Kurd im, Xwedê ez afirandiye, parastina hebûn û nasnameya min erkê min ê bingehîn e.” Ol, mezheb û komên li Kurdistanê divê li ser xalên ku li ser wan li hev dikin, bi awayekî aştîxwaz yekîtiya neteweyî saz bikin û ji bo ku li ser axa xwe bi azadî bijîn, têbikoşin.”

Daxuyanî wiha bi dawî bû: “Her Kurd divê bêyî ku ji ramana Kurdistana yekbûyî û serbixwe tavîz bide, bi îstîqrar û bi israr li ser vê yekê bisekine. Îro em dibînin ji bo parastina destketiye gelê me yê Rojava bi ruhekî neteweyî û bi helwestekî bi rûmet li her parçeyên Kurdistanê û seranserê cîhanê li dijî çeteyên HTŞ û dewleta Tirk a dagirker li ber xwe didin. Divê em bi israr li ser serxwebûna Kurdistanê û azadiya gelê xwe  bisekinin. Wernebe em nikarin gelê xwe ji zilma dagirkeran rizgar  bikin.”