Kurdistaniyên li bajarê Stockholmê ji bo şermezarkirina darvekirinên çalakgerên siyasî yên Kurd, bi taybetî Heyder Qurbanî yê ji bajarê Kamyaran ku ji sala 2016'an û vir ve girtî bû û di 19'ê Kanûnê li girtîgeha Sine bêy ku malbata wî were haydarkirin û bi awayek veşartî hatibû darvekirin, çalakiyek lidarxistin.

Çalakî danê êvarê saet 17:00'an li kolana here qelebalix a Drotningatan a li navenda bajarê Stockholmê pêk hat.

Çalakvanan li wir wêneyên Heyder Qurbanî, alên PJAK, KJAR û pankartên ku li ser qala kiryarên hovane yên Îranê dihat kirin hatin hildan. Her wiha dirûşmeyên weke “Îran, destê xwe ji xwîna Kurdan bikşîne”, “Bimre terora îran” û “Îdam sûcek dijmirovî ye” hatin berzkirin.

Di çalakiyê de daxuyaniyek hate dayîn û hate gotin: “Îran a ku ji bo darvekirina girtiyên siyasî  her carê qilif û hêcetekê dibîne, bêyî ku tu mafên navnetewî bigre ber çavan pêk tîne. Bi taybet bêdengiya Ewropa û raya giştî ya li hemberî wan kiryarên hovane û dije mirovî, hêzê dide Îranê. Heke helwesteke berbiçav a cîhanê hebe, bê guman wê Îran jî nikaribe wisa bi hêsanî çalakgerên siyasî darvebike.”