Li bajarê Hambûrg a Elmanyayê cejna vejînê bi coşeke mezin hat pîrozkirin.

Pîrozbahî li salona dawetê ya Phonîx a dikeve taxa Harbûrg a Hambûrgê hat lidarxistin. Merasîm bi deqeyek rêzgirtina ji bo bîranîna şehîdên şoreşa Kurdistanê ve destpêkir.

Li dora cihê merasîmê ku Salîh Farqîn û Adalet Şare pêşkêşvaniya wê dikirin, posterên di serî de yên Rêberê Gelê Kurd Abdullah Ocalan, Mazlûm Dogan, Sakîne Cansiz, Mahsûm Korkmaz, Kemal Pîr û Mehmet Hayrî Dûrmûş, yên gelek kadroyên pêşeng hatin daliqandin.

Li wir siyasetmedarê Kurd Mervan Botan axivî û diyarkir ku di têkoşîna azadiya gelê Kurd de PKK kevirê bingehîn e. Botan da zanîn têkoşîna ku bi komeke şoreşger ve destpêkir gihiştiye milyonan û ragihand ku çi dibe bila bibe wê têkoşîna azadiyê bidome û gelê Kurd bi ser bikeve.

Piştî axaftinan Hunermend Xemgîn Bîrhat û Koma Siyabend derketin ser dikê. Di merasîmê de her wiha Deza Saî û Salîh Farqînî helbestên xwe xwendin.

Di pîrozbahiyê de her wiha têkildarê têkoşîna azadiya Kurd sînevîzyon hate nîşandan.

Pîrozbahî bi stranên dîlanê yên Koma Siyabend û gerandina govendê bi dawî bû.