Pîrozbahiya Newrozê ku li Phoenix Gandy Center a bajarê Exeter a Îngilistanê hat lidarxistin, diyarî erdheja li navend Kurdistanê hat kirin. Pîrozbahiya Newrozê di şexsê Mazlûm Dogan û ji Fermandarên Berxwedana Sûrê Cîhan Turkan (Çiyager) de ji bo hemû şehîdên Kurdistanê û kesên di erdhejê de jiyana xwe ji dest dane, bi deqeyek rêzgirtinê destpê kir.

Di pîrozbahiya Newrozê de pankartên Rêberê Gelê Kurd Abdullah Ocalan û Mazlûm Dogan li ser dikê hatin daliqandin û gelek caran dirûşmeyên “Bijî Newroz”, “Bijî Serok Apo”, “Bimre faşîzm” û “Bijî berxwedana gerîla” hatin berzkirin.

Beşdaran cil û bergên neteweyî yên bi taybet ji bo Newrozê li xwe kirin û govenda pêşî zarok gerandin. Dr. Alan Hassaniyan axaftina vekirinê kir. Hassaniyan, kesên ku di erdhejê de jiyana xwe ji dest dane bi bîr anî û bal kişand ser girîngiya piştevanî û têkoşînê. Hassaniyan got, “Newroz jiyan e. Newroz, ‘Jin, jiyan, azadî’ ye. Newroz berxwedan e û ev berxwedan li her çar parçeyên Kurdistanê veguheriye serhildan û qirîna azadiyê.”

Li ser navê Meclîsa Gel a Kurd Ercan Akbal axaftinek kir. Akbal bi bîr xist ku ew Newrozê diyarî erdhejê kirine û got: “Em ê bi ruhê Mazlûm Dogan û Çiyager têkoşînê mezin bikin. Em ê berxwedanê mezin bikin û faşîzmê hilweşînin. Em ê gelê xwe nekin neçarî vê dewleta faşîst. Lewma me Newrozê diyarî piştevaniya mexdûrên erdhejê kir.”

Akbal bal kişan ser tecrîda li ser Rêberê Gelê Kurd Abdullah Ocalan û wiha got: “Em careke din dibêjin, em ê tu caran jiyana bêyî Rêber Apo qebûl nekin.”

Di Newroza Exeterê de ku beşdaran bêyî navber dirûşme berzkirin û çepik lêdan, li gel stranên hunermend Memozan govend hat gerandin. Her wiha ji bo piştevaniya mexdûrên erdhejê sindoqên alîkariyê hat danîn û beşdaran eleqeyek zêde nîşan da.