Di çalakiya li Stockholmê de ku Komkujiyên Parîsê hatin protestokirin, dewletên Ewropayî hatin şermezarkirin ku çima dengê xwe ji polîtîkayên qirkirinê yên dewleta Tirk re nakin û rê li ber qetlîamên din vedikin.
Kurdistaniyên li bajarê Stockholm ê Swêdê, bi banga KCDK-E’yê, bi lidarxistina meşê Komkujiyên Parîsê protesto kirin.
Di meşê de wêneyên şeş şehîdên qetlîamên Parîsê hatin hilgirtin û dirûşmeyên “Erdoganê kujer”, “Erdogan tundûtûjiyê dike, Ewropa lê dinihêre” û “Sara, Rojbîn, Ronahî, jin, jiyan, azadî” hatin berzkirin. Meş, ji ber Norra Bantorgetê dest pê kir ta bi qada Sergels Torget li navenda Stockholmê dewam kir.
Gava meşê, belavokên li ser qetlîamên Parîsê amadekirî, hatin belavkirin û li ser armanca meşê bi Swêdî axaftin hatin kirin.
Berdevka Yekîtiya Jinên Kurd a Skandînavyayê Ayşe Goktepe li qada Sergels Torgetê axaftinek kir.
Ayşe Goktepe wiha axivî: “Dewleta Tirk a bi pêşengiya yekî wek Erdogan ê xwînxwar, terora li Tirkiyeyê dikir niha jî li welatên Ewropayê dike. Sedem, bêdengî û ranebûna bi helwest li ber dewleta Tirk e. Di dewreke wiha de ku jinên Kurd bûne sembola berxwedan û serhildanê, helbet wê dijminên Kurdan vê ranegirin. Divê gelê me li her derê bi tidarek be. Heta ev qetlîam neyên safîkirin em ê her li qadan bin, bidin ser şopa hevrê û berxwedêrên gelê xwe.”
Çalakî, bi berzkirina dirûşmeyan bi dawî bû û banga tevlêbûna çalakiya danîna çelenga reş li ber Balyozxaneya Fransayê hat kirin ku wê 9’ê Çileyê saet di 12.00’an de bê lidarxistin.
