Kongreya Civakên Demokratîk ên Kurdistaniyên li Ewropayê (KCDK-E) li ser salvegera komkujiyên Helebçe, Qamişlo, Gazî û Efrînê daxuyaniyek weşand.

Di daxuyaniyê de hate ragihandin ku meha Adarê ji aliyê gelê Kurdistanê ve meha komkujî û berxwedanê ye û hate destnîşankirin ku gelê Kurd bi berxwedan û têkoşînê nirxên xwe parastiye.

Di daxuyaniyê de hate gotin, "Dîktator Saddam sala 1988'an li Helebçeyê bi gazên kîmyewî û hardalê 5000 mirovên me qetil kir, dewleta Tirk a mêtinger jî 12'ê Adara 1995'an li Stenbolê Komkujiya Gazî kir. Rejîma Sûriyeyê jî 12'ê Adara 2004'an hewl da provokasyona şer bixe nava Kurd û Ereban û komkujî kir. Faşîzma AKP-MHP'ê jî 18'ê Adara 2018'an bi heman zîhniyet û polîtîkayên komkujiyê Efrîn dagir kir. Van polîtîkayên dagirkerî û komkujiyê nekarîn têkoşîna azadiyê ya gelê Kurdistanê asteng bike û hêrs û biryardariya gelê me ya ji bo têkoşînê jî mezin kir.

Dewleta Tirk bi heman zîhniyet û armancê îro jî bi rengekî bêperwa li Kurdistanê êrişan dike. Çawa ku yên komkujî li Helebçe û Qamişloyê kirin winda kirin, dewleta Tirk jî li pêşberî têkoşîna azadiyê ya gelê me têk diçe û ketiye nava krîzên giran.

Dîrokê careke din nîşan da ku bi zext û tundiyê, têkoşînên azadî, wekhevî û demokrasiyê nikarin bêne astengkirin. Çekên kîmyewî, biyolojîk an jî konvansiyonel, kîjan çek bê bikaranîn jî, bi komkujî û tundiyê têkoşîna demokrasî û azadiyê nikare bê astengkirin. Wê nikaribin li pêşiya têkoşîna wekhevî, azadiyê ya gelê Kurd bibin asteng.

Zîhniyeta ku doh li Helebçeyê bi çekên kîmyewî û biyolojîk hewl da têkoşîna gelê me bitepisînin, bi heman rengî li Efrîn, Şengal, Başûr, Mexmûr û Bakur îro jî êrişî gelê me û nirxên me dike û hewl dide temenê xwe dirêj bike.

Bi navê KCDK-E'yê em bang li tevahiya gelê Kurdistanê dikin ku li dijî êrişên qirker û komkujiyan, wezîfeya xwe ya wijdanî û exlaqî bi cih bînin, li ser bingeha yekîtiya neteweyî berxwedanê mezin bikin û azadiya gelê me ku daxwaza şehîdên me ye bi cih bînin."